شخباركم؟
بما أن الجامعة راح تبدي قريب، راح أقولكم عن دفتري الجامعي اللي سويته كورس اللي طاف، كنت أبي دفتر حلو ومميز، وقعدت أدور في الإنستا وجفت واجد حسابات يطبعون دفاتر وأسعارهم كانت تتراوح بين 4 د.ب إلى 9 د.ب .. وبعد مدة من المقارنة قررت أسوي دفتري عند فرفشة لأن بنت خالتي قالت لي أنه مسويه عندهم من قبل.
المحل في داركليب، قريب من الجامعة. أول ماتدشون المحل الطابق الأرضي يبيعون مكياج وألعاب وخراخشين حسبت أنني دخلت محل غلط، يوم سألت اللي في المحل قال أنه في الطابق الثاني، في الطابق الثاني عنهم أغراض هدايا وأشغال يدوية، فرديت سألت قالو روحي للطاولة اللي في الزاوية. يعني صاير مثل مكتب صغير جدرانه زجاج قبال الدرج
المنتجات: يطبعون على كلشي تقريباً، فانيلات، دفاتر، مقالم، كفرات تلفون، كوب... إلخ
سهولة الإستخدام: تروحون لهم وتودون الديزاين الي تبون تطبعونه في فلاش ميموري (أو تختارون من الديزاينات اللي عندهم)، بيسيفون الديزاين اللي إخترتونه في الكمبيوتر عنزهم وبيرجعون لكم الفلاش. بيقولون لكم تدفعون مقدم، دفتري كان سعره 4 دينار، فأنا أخترت أنني أدفع نص المبلغ مقدم (دينارين)، والدفتر جهز في اليوم اللي عقب :)
الأسعار: أسعارهم حلوة ورخيصة
كفر تلفون ثريدي: 4.500 د.ب
كفر تلفون ربر: 3.500 د.ب
كفر تلفون بلاستك: 3 د.ب
مقلمة: 3.500 د.ب
كوب: 2.500 د.ب
كوب سحري: 3 د.ب
كوب حافظ: 5 د.ب
رخامة كبيرة: 5.500 د.ب
رخامة صغيرة: 4 د.ب
ميدالية: 2 د.ب
مخدة: 6 د.ب
فريم خشب: 4 د.ب
تعليقة سيارة: 2 د.ب
ساعة: 5 د.ب
منظرة: 2 د.ب
إطار خشب (نفس إطار إيكيا): الصغير 10 د.ب و الكبير 12
فانيلة: 4.500 د.ب
شباحة الأطفال: 4 د.ب
و يسون أطقم مواليد وأشياء واجد تقدرون تستفسرون منهم أكثر
خدمة العملاء: خدمتهم واجد حلوة وسريعين في الرد ماياخذون حتى 10 دقايق (في الواتساب)بس ماأدري اذا كانو يردون بنفس السرعة في الإنستا
هل كان المنتج مثل الوصف في الموقع؟
الدفتر كان حلو والطباعة واضحة، الكفر كان مطبوع على ورق مقوى وفوقه بلاستيك شفاف علشان مايتلعوز أو يخترب، بس الكفر ماكان مقوى كفاية يعني إذا بتكتبون فيه لازم تحطون تحته شي (فهمتون قصدي؟)
عرفتون نوع الدفتر اللي أقصده؟ هذا اللي في كل مكان تحصلون منه حتى في برادة الجامعة :d
مميزاته:
- أسعاره رخيصة مقارنة بباقي محلات الطباعة
- يطبعون على كلشي تقريباً
- عندهم ديزاينات جاهزة تقدرون تعدلونها أو تقدرون تجيبون ديزاين من عندكم
- بسرعة يجهز الأوردر
- خدمتهم العملاء ممتازة
سيئاته:
- جودة الدفتر كانت فاشلة، أستخدمو الدفاتر الرخيصة اللي تنباع في كل مكان
- مقارنة بجودة الدفتر السعر كان مرتفع، كنت أقدر أطبع كفر وأحطة على الدفتر وبيطلع بنص السعر
شنو أشتريت من عندهم؟
دفتر 3 مواد، والديزاين أنا اللي جبته، أخذت الديزاين من مدونة Belinda Selene، حق الكفر اللي ورا، بعد أستخدمت واحد من ديزايناتها، لكن محيت الكتابة اللي هي حاطتها وحطيت بدالها كلمات أغنية The script (الأغنية إسمها Hall of fame)لأن الأغنية حلوة وتشجع، من أحس أن مالي مزاج أدرس أقرأ الكلمات وأتشجع ♥
هذا الكفر من ورا، كتبت فيه كلمات الأغنية كلها ♥
هذا جزئي المفضل في الأغنية ♥♥♥
بتعامل وياهم مرة ثانية ؟
إممم، مابسوي عندهم دفاتر مرة ثانية، لكن عجبتني الكوب اللي داخلها ملون، والميداليات اللي عليها رقم السيارة، أتوقع بسوي لي منها
الرأي النهائي: التجربة ماكانت فاشلة، لأن الدفتر كان واجد حلو، لكن جودته كانت مخيبة للآمال، أتمنى أنهم يجيبون دفاتر جودتها أحسن.
أنصح فيه: إذا كنتوو تبون طباعة جودتها حلوة وتجهز بسرعة (وماتهمكم جودة الأوراق) هذا المحل يناسبكم
التقييم: 5/3
تواصلو معاهم:
فرفشة للطباعة للطباعة على مختلف الاشياء
Saturday To Thursday
4:00PM - 10:00PM
Tel: +973-77072585
WhatsApp: +973-34473324
داركليب - البحرين
Snap: farfasha_p
instagram.com/farfashah
تبون أسوي ريفيو حق متاجر إنستقرام؟
أحد طبع عندهم قبل؟ في محلات ثانية تنصحون فيها للطباعة، أكتبو لي في الكومنت تحت أو في وسائل التواصل الإجتماعي التالية
 |  |  |  |  |  |
