السلام عليكم..
سويتو بطايقكم ولا للحين؟ أذا ما سويتوها رجعو لموضوعي السابق و شوفو شلون تسون وحدة، إذا سويتو وحدة، في هذا الموضوع راح اشرح لكم شلون تقدرون تسوون لكم حساب باي بال وتشبكون البطاقة عليه حق تستخدمونها
◄أول شي هل الحساب مجاني؟
فتح حساب في باي بال مجاني، و تحويل الفلوس في الحساب مجاني و الشراء مجاني، و لكن في حالات عليها رسوم وهي :
- تلقي المدفوعات للسلع و الخدمات
- تلقي الاموال من الاهل والاصدقاء بإستخدام البطاقه الإئتمانيه
- تلقي مدفوعات من الناس في بلدان اخرى
◄ شنو فايدة باي بال ؟ ليش ما ادفع بالبطاقه مباشرة ؟
يصير تدفعون مباشرة بالبطاقه، بس أنا ما انصح فيه لأنه مو أمان وانتو ماتضمنون أن كل المواقع اللي بتشترون منها أكيد مابيحفظون معلومات البطاقة، ولأن من مميزات باي بال:
- تقدرون تدفعون ببطاقتكم بدون ما أحد يعرف اي شي عن هذي البطاقة، لا رقمها ولا شي (يعني ما يقدرون يبوقون معلومات البطاقه و يزورونها)
- بمجرد انكم تشبكون البطاقه مع حساب باي بال ما يحتاج إنكم كل مرة بتشترون تدخلون رقم بطاقتكم في كل موقع بتشترون منه. يعني أسرع يصير
- إذا البضاعة ماوصلت أو صار سوء تفاهم مع أحد البائعين وعاندكم تقدرون ترفعون عليه شكوى في باي بال وراح ترجع لكم فلوسكم غصباً عنه
شلون نسجل في الموقع؟
1. نفتح الموقع www.paypal.com
2. بتطلع لنا هذي الصفحة، ننزل تحت للزاوية ونضغط على العلم حق نغير الدولة
بتطلع لنا هذي الصفحة، نختار دولتنا، أنا أخترت البحرين طبعاً. كل دول الخليج العربي موجودة هني :)
4. إذا اخترنا دولتنا راح ننتقل لهذي الصفحة، نرد نروح صوب العلم الصغير اللي في زاوية الصفحة، بس هالمرة نختار العربية عشان تتغير لغة الموقع إلى العربي
5. بعد ماغيرنا اللغة نختار نوع الحساب اللي بنسوية وهو الحساب الشخصي ونضغط متابعة
6. راح يطلع لنا جذي، نحط إيميلنا وكلمة السر اللي نبي نستخدمهم في الموقع (حطو إيميل انتو تستخدمونه وعارفين كلمة السر مالته)، عقب نضغط متابعة
7. بننتقل لهذي الصفحة نحط فيها معلوماتنا الشخصية، ضروري تملونها صح وتتأكدون من كل المعلومات بالأخص العنوان، لأنه هو اللي بتتطرش عليه مشترياتكم عقب نضغط موافقة وإنشاء حساب
8. بيوصلنا إيميل (على الايميل اللي سجلنا به) حق تفعيل الحساب، نضغط المربع الاصفر اللي مكتوب فيه Activate
9. بتطلع لنا هذي الصفحة، نكتب كلمة السر اللي سجلنا بها ونغط تأكيد عنوان البريد الإلكتروني
10. بتطلع لنا هذي الصفحة، نضغط على ربط بطاقة
11. بتطلع هذي الصفحة نحط بيانات البطاقة فيها وعقب نضغط حفظ
وبجذي بنكون خلصنا من الـPayPal وبيكون باقي لنا جزء واحد من هالسلسلة وهو شرح لـeBay.
إذا واجهتكم أي مشاكل أو صعوبات، أو عندكم أي أسألة أو إستفسارات، تقدرون تكتبونها في الكومنت تحت أو تتواصلون وياي على وسائل التواصل الإجتماعي التالية:
 |
 |
 |
 |
 |
 |
