بطاقة الشراء من النت ♥

ذبحتكم الأسعار المرتفعة للبضلئع في الإنستغرام؟

تبون شي بس مو موجود في البحرين؟

الحل الأمثل؟...  الشراء من النت!

الكل خاطرة يشتري من النت، بس مايعرف شلون، و المشكلة الثانية أنه ماعنده حساب في البنك ولا بطاقة فيزا، أو عمره صغير ومايقدر يفتح له حساب في البنك، أو ما يأمن أنه يدفع من حسابه البنكي (خوفاً من انه يتهكر حسابه)

قبل فترة كلمتني وحدة على الدايركت تبي تطلب من النت بس ماكانت عارفة شلون، فحبيت أسوي هالموضوع حقها ولكل الناس اللي يبون يشترون من النت :)

في البداية راح أتكلم عن بطاقة الشراء من النت، وبعدين بعلمكم شلون تسوون حساب في الــPaypal (وليش) و في الأخير بشرح لكم شلون تستخدمون eBay طبعاً كل نقطة بتكون في بوست بروحها ;)

نبدأ بموضوعنا الأول:

بطاقة الشراء من النت

1- شنو هي هذي البطاقة؟

عي بطاقة خاصة للإستعمال في النت، يعني ماتقدرون تستخدمونها إلا حق تشترون من النت. عادةً تكون فيزا

2- من وين أطلعها؟ من البنك أكيد -.-

تقريباً كل البنوك في البحرين توفر هذي البطاقة، أول وحدة طلعت عي بطاقة CrediNet من بنك البحرين و الكويت، وهي أول بطاقة إستخدمتها، طبعاً ماكانت بإسمي لأن كان عمري 14 سنة تقريباً فكانت بأسم الوالد الله يحفظه ويطول في عمره.

أستخدمتها تقريباً سنة، ما أعرف شنو الأشياء المطلوبة حق تطلعونها بس اللي أعرفه أنه تملون فورمة وتدفعون رسوم الأشتراك، وتستوي عقب كم يوم.

مشكلتهم أنهم ياخذون نسبة على كل أوردر تسوونه يعني بسرعة تطير الفلوس، وغير الحركة البايخة أنه اذا بتشترين شي ويكون المبلغ اللي في البطاقة مايكفي يخلونج تشترين عادي ويعتبرونه دين لازم تدفعونه (بدون مايقولون لكم) وكل ما تتأخرون في الدفع يحسوب عليكم زيادة وأنتو خبر خير، عقب لما تروحون تحطون فيها فلوس تنصدمون أنهم سحبو المبلغ اللي حطيتونه وجمدو البطاقة، ويطالبونكم تدفعون لهم، كلش مالها داعي الحركة، فقمت أدور لي على بطاقة ثانية ماتوهقني مثل هذي البطاقة.

وأكتشفت بطاقة بنك البحرين الإسلامي، كانو توهم مطلعينها وشفت الإعلان مالها  مالها علي الليت اللي ف الشارع وقلت خلني أشوف وش سالفتها.

رحت البيت، فتحت موقعهم، وقريت عن البطاقة وشروطها وكلشي، في ذيك الفترة كان بابا مسافر، يعني ماقدر أسوي بطاقة الا إذا رجع بالسلامة. فقلت أجيك أنواع البطاقات اللي يسوونها.

بنك البحرين الإسلامي يوفر نوعين من البطاقات للشراء من النت:

◄ االبطاقة الإلكترونية ذات الحد الائتماني: يجي بيل نهاية الشهر (مايحتاج تشتحنونها فلوس)

◄ االبطاقة الإلكترونية ذات الدفع المسبق: لازم تشحنونها فلوس حق تقدرون تشترون بها

لتبسيط الأمور، البطايق مثل أرقام التلفون، نوع مسبق الدفع تشحنونه كردت حق تتصلون وكل ماخلص الكردت تشحنونها.  والنوع الثاني ذات الحد الإئتماني (آجل الدفع) مثل بطاقات الــGSM اللي تتصل على راحتك وآخر الشهر يجيبون لك بيل تدفعه.

شخصياً: ماأنصح ببطاقة لاحق الددفع، لأنه بتكونون قاعدين تصرفون فلوس هي أساساً مو عندكم (تشترون بالدين) يعني بيكون سهل عليكم تصرفون مبالغ واجد بدون ماتنتبهون وعقب تنصدمون من البيل، أو حتى لو حاسبين بالضبط جم بتدفعون ومسوين ميزانية، لاسمح الله يصيدكم ظرف أو شي نهاية الشهر وماتقدرون تدفعون البيل ← طبعاً هذي البطاقة تناسب الناس اللي عندهم حس بالمسؤولية ويتحكمون في روحهم، ولازم عندهم دخل ثابت (يشتغلون يعني)

النوع اللي أستخدمه هو مسبق الدفع، تحطون فيها الفلوس وتشترون بها، من تخلص تردون تشحنونها وهذا أسهل بالنسبة لي، يعني حزة اللي عندي فلوس أشتري، وإذا ماعندي فلوس ما أورط روحي بالدين. وأحسن شي أن الدفع كاش ♥

يطلعونها مجاناً (بدون رسوم)

البطاقة يطلعونها للأشخاص اللي عمرهم 15 سنة فأكثر

 المستندات المطلوبة (البطاقة ذات الدفع المسبق):
- هويتين ساريتي المفعول (بطاقة سكانية / ليسن / جواز..إلخ)
- نسخة من تصريح الإقامة (لغير البحرينيين)

تروحون لهم البنك وتاخذون رقم (اللي قاعدين ف المكتب)، اذا جاء دوركم تروحون لهم وتقولون نبي نطلع بطاقة الشراء من النت، بيعطونكم فورمة تملون فيها بياناتكم وتوقعونها، عقب بيقولون نبي هويتين (اختارو واحد منهم: ليسن او بطاقة سكانية او جواز) بياخذونهم يطبعونهم ويرجعونهم لكم، عقب بيقولون لكم ان البطاقة راح تجهز خلال إسبوع، وبيجيبونها لكم لباب البيت :)

ألحين بما أن البطاقة عندنا شلون نستخدمها؟
1. جهزي الفلوس
2. روحي البنك
3. ناخذ رقم (حق الكونتر)
4. ناخذ فورمة (موجودة هناك على الطاولة) ونمليها
5. ننتظر دورنا يجي
6. نعطي الموظف الفلوس والبطاقة والفورمة
7. الموظف بيرجع البطاقة وبيعطبكم رصيد
8. الفلوس راح تنزل في البطاقة عقب 24 ساعة (ساعات قبل)
9. راح يوصلكم مسج في التلفون لما تنزل الفلوس في البطاقة

أو تقدرون تجيكون البطاقة كم فيها من خلال الموقع
1. إفتحو الموقع: www.ebisb.com

2. إضغطو OK حق يروح التحذير بعدين إختارو دفع البطاقات

3. راح يطلع لكم جذي، أكتبو رقم البطاقة في المكان المخصص، والرقم السري دخاوه عن طريق الضغط على الأرقام اللي على صوب

4. نضغط login

5. بتفتح لنا هذي الصفحة وفيها رصيد البطاقة

مميزاتها:

- مسبقة الدفع

- مجانية

- يمكن للأشخاص اللي عمرهم أقل من 15 سنة فما فوق يسوونها بأسمهم

- ماتحتاج يكون عندكم حساب في البنك

- سهلة الأستخدام

- يرسلون لكم مسج بكل عملية تصير في البطاقة

- خدمة العملاء عندهم ممتازة

- عندهم فروع في كذا منطقة

- ماياخذون نسبة عى الشراء (بس ياخذون فرق العملة)

- قبل لاتنتهي البطاقة بشهر يتصلون فيكم ويقولونن أنه بيطرشون لكم البطاقة عن طريق أرامكس ويعطونكم الوقت بالضبط، ويسلمونكم البطاقة يداً بيد، واجد عملية الحركة ♥

- عندهم عرض مع شوب أند شيب، الأشتراك بنص السعر (للحين ماجربيته)

عيوبها:

- الفلوس ماتدخل في الحساب الا بعد 24 ساعة

- حق تشحون البطاقة لازم تروحون البنك (إذا عندكم حساب في هذا البنك تقدرون تحولون الفلوس اونلاين بدون ماتحتاجون تروحون البنك)

وخلصنا الكلام عن البطاقة، إذا كان عندكم إستفسار او اي شي مو واضح أسألوني وراح أجاوبكم

وأنتظروني في الجزء الثاني من هاي السلسلة، وهو شلون تسوون حساب في بايبال وتشبكون البطاقة عليه :)